'S war emol in Altrip
Vunn de Gäns in de Unnagass
Karl-Heinz Stohner, Mutterstadt
Sellemols, ’s wor in de fuchzischer Johr, sinn in de Unnagass blous Fuhrwerk g’fahre vor die Gail odda Kieh g’schbonnt worre sinn. Selde hot sich in däre Zeit ä Audo drin varerrd. Häigschdens alle verzeh Daag, odda sou, in Bierlaschder, der wu die Wertschafde in de Schdrooß mit Getränke unn Schdongeeis, vunn de Eiswerke in Lu, beliffert hot. Die Unnagass war domols noch ned asphaldiert. In de Summahitz hott’s g’schdaabt unn wonn’s gerechad hot war die Gass än Babbaradatsch. Do hodd ma uff de Schdrooß nimmi laafe kenne uhne bis iwwa die Knechel im Schlomm oizusinke. Unsa Unnagass war nix onnares wie in uffg’fillde Feldweg unn iss erschd so Ofong de sechzischer Johr geteert worre. Mer Buwe wore bei schänem Wedda vun moijschens bis owends uff de Bää, sinn om Altrhoi, uff’m Werth, de Unnablatt, om Rhoi odda im Waldpoik rumg’schdromad. Wonn ma mit de Owwagässer Hännel g’hatt hänn worn ma a mol uff de Owwablatt odda uff de Horreinsel unnawegs. Awwa ned so oft. Unsa Revier war halt ’s Unnadorf mit allem wass dezu g’heert hodd. Do hän mer Feger uns sauwohl g’fiehlt, unn, newebei g’saad, so allahond og’schdellt. Mer gedenkt noch, wonn ma im Summer Schulferie katt hänn unn voller Abenteuerluscht wore, dass ma donn ab unn zu unn mit grouser Frood, Vormiddags die Gäns uff de Gass gejagt hänn. Jeden Moijsche im Summa wonn die Hofdoore uff gonge sinn hots die Wullewulle nimmi g’halde. Die sinn im Gänsemarsch unn mid’m schebbe Kopp aus de änzelne Heef rausgewadscheld unn schnurschdracks Richdung Altrhoi abgeboche. De Weg hän die schlaue Wassafeschel genau gekennt. Unn uff die hänn mer grad gewaad.
Wusse uns donn g’seje hänn, sinn se glei ogriffsluchdisch worre, hänn gezedad, in longe Hals gemacht, g’faucht unn gezischd wie ä Schlong, hänn sich grous gemacht unn uffgeregd mit de Flichel g’schlache. Om schlimmschde hot sich de Gerred uffg’fiehrt. Der hodd soga Schnawwelhieb ausdääle – unn uns beise wolle. De Kobb mid’m lonnge Hals faschd uff’m Bolle hodda soford ogegriffe. S drooe hodd’m awwa nix genitzt. Mer Gänsdreiwa hänn ko Ongschd vor demm Schreihals g’hadd. Awwa Reschbeggd! Grad war dess Schnaddavolk uff die Gass gewadscheld, schunn hänn ma se gejaagd. Volla Ponik hänn se og’fonge zu renne, de Hals long g’schdreckt, gekrische wie om Schbies, die Flischl g’schwunge unn mit laudem Gezänk sinn se donn in die Luft g’fladdat unn on de Althroi g’floche. Mer hinnenoch gerennd. Nadierlich aa gegrische. Dess war ä Jacht unn mer volla Luschd unn Lewe. Ä wildi Schdrooßebonde, valleicht 8 – 12 Johr alt. Wu die Gäns donn midd ehre oroscheroude Watschelfies uff de Wassaowafläch gelond sinn hänn die onnare Wassafeschel reisaus genumme. Die Gäns hänn weida gekrische, als wie wonn se ehr Feddare rausgrobbt krägde, sou uffgereegd wore se noch. ’S hot awwa net long gedauad, do worn se beruischd. De Hals oigezoche hänn se og’fonge ehr Feddakleed in Ordnung zu bringe unn’s G’fieda zu butze. De gonze Daag hänn se sich donn om Altrhoi uffg’halde, im Wassa g’suddelt, g’schnaddad unn g’fresse – als Selbschtvasorger hän se om Ufa wie im Schlick genung zu fresse g’funne – unn uff de zwä Insle, unnahalb vum grouse Belleboom, hänn se ehr Vadauungsschläfl g’halde, unn ab unn zu ehr zufriedenes G’schnadda heere losse. Noch ä Zeitlong hänn ma dem Dreiwe zugeguggt, unn wuss uns zu longweilisch worre iss sinn ma losgezoche um wass onnares ozuschdelle. G´funne hän mer immer wass. In dere Sach warn ma durch wi ä Blousrohr.
Wie g’saad, die Gäns hänn sich de gonze liewe longe Daag om Altrhoi rumgedriwwe unn sinn gesche Owend, wonn’s Zeit wor fa de Schdall, im Gänsemarsch widda hom - unn soga in die richdische Heef noi maschierd. Allä! unn kooni falsch abgeboche. Die hänn genau gewisst wu se hie g’häre unn sich aa unnanonna guud gekennt. Do soll mol ona saache „Dummi Gons"! No no, die sinn schlau. Zuminndescht die in de fuchzischer Johr in Altrip worn’s! Unn ned blous schlau, nä, die worn aa noch droi unn vor allem wachsom dezu. Bei denne iss koona uogemeld in de Hof kumme so hän die in Krach gemacht unn glei Alarm g’schlache Unn wonn ned so frieh in ehrm Lewe St. Maddin odda Woihnachde dezwische kumme – unn Gänsebroode aus’n worre iss – donn sinn se b’schdimmd ä paar schäne Gänsejohr alt worre.
So ehr liewe Leit dess iss ä Episod vun de Unnagass in Altrip aus de fuchzischer Johr. Ich hebb vasuchd so genaa wie meeglich die G’schicht zu vazähle. Ob mass gelunge iss iwwaloss ich eierer eichene Erinnarung. Alladings, dess nemm ich emol sou oo sinn nimmi oig viel Unnagässa dou, die dess noch alles wisse. Meeglicherweis hot sich aa mit’m Abschdond vagongena Johre de Mondel vum Vagesse driwwer geleggd. ’S iss halt schunn long her. Unn ich glaab aa, dasses in de Unnagass heitzudaag ko onzischi Gons mehr gibt. Schad drum! Alla hopp! Alla donn!
2019, Kategorie: Sonderpreis des Kultur- und Heimatkreises Dannstadter Höhe
Kein Audiobeitrag verfügbar!